Testo: Angelo Branduardi. Calenda Maia.

Calenda maia
Ni fuehls de faia,
Ni chans d'auzel
Ni flors de glaia
Non es que'm plaia,
Pros dona gaia
Tro qu'un isnel
Messatgier aia
Del voste bel
Cors, qu'im retraia
Plazer novel
Qu'amors m'atraia
E jaia
E'm traia
Vas vos, Domna veraia,
E chaia
De plaia
'L gelos,
Anz que'm n'estraia.
Ma bel'amia,
Per Dieu non sia
Que ja'l gelos
De mon dan ria,
Que car vendria
Sa gelosia,
Si aitals dos
Amantz partia;
Qu'ieu ja joios
Mais non seria,
Ni jois ses vos
Pro no'm tenria;
Tal via
Faria
Qu'oms ja
Mais no'm veiria;
Cel dia
Morria, Domna
Pros, qu'ie'us perdria.
Domna grazida,
Quecs lauz'e crida
Vostra valor
Qu'es abelida,
E qui'us oblida,
Pauc li val vida,
Per qu'ie us azor,
Domn' eissernida;
Quar per gencor
Vos ai chausida
E per melhor,
De pretz complida,
Blandida,
Servida Genses
Qu'Erecs Enida
Bastida,
Finida, N'Engles,
Ai l'estampida.