Testo: N.C.C.P. (Nuova Compagnia Di Canto Popolare). Tarantella Ca Nun Va' Bbona. Trapenarella.

Trapenarella c''o trapenature
trapena 'a mamma e 'a figlia pure,
e trapenianno 'mmiezo a 'sti guaie
canto 'a canzone d''a cuccuvaia.
'Na signurina cammina p''a strada
'nu giuvinotto lle fa 'na guardata
e chella ch'e subito femmena onesta,
areto 'o purtone s'aiza 'a vesta.
San Genna' pienzace tu
ca tanto d''e corna nun se campa cchiu.
'Nu prevete 'ncoppa all'altare maggiore
te pare 'nu santo predecatore
ma quanno va rinto 'a sacrestia,
vo' mille lire p'a Avummaria...
San Genna tu vide a chiste
'mbrogliano pure a Gesu Cristo.
Nuce, nucelle, castagne 'nfurnate
quante paise aggio curriato,
'a Torre d''o Grieco e a Nunziata
e quante guaie aggio truvato
e quante difiette c'aggio cantato..
'E cul'a mappata so' e veneziane,
'e magnapolenta songo 'e Milano,
'e meglie cantante stanno a Giugliano,
'e tirapistole stanno a Casale.
'E facce toste songo italiane,
'e cchiu mafiuse so' siciliane,
e po' 'e sbruffune songhe 'e Rumane,
'e femmene belle so' napulitane,
'e mazz''e scopa so' americane.
'E mbruogliamestiere so' ll'ingegnere,
'e 'mbruogliamalate so' ll'avvocate
'e prievete fann' 'e zucalanterne,
'e cchiu mariuole stann''o guverno.
San Genna dice ca si,
chi 'o ssape comme va' a fferni.
'Na signurina a via Dei Mille
s'ha miso 'a parrucca 'a copp''e capille,
quanno va 'a casa se magna 'e purpette,
e chi teme famme guarda 'e rimpette.
'Nu giuvinotto cu 'e sorde d''o pato
s'accatta 'o cazone 'mpusunato,
po' va dint''a machina allero allero,
e vo mena' sotto a chi va a ppere.
E cunuscite a 'sti "milorde"
e chille stanno 'nguaiate 'e sorde,
'e pate so' tanti scurnacchiate,
e campano 'ncopp''a famme 'e ll'ate.
San Genna pienzace tu
ca tanto d''e 'mbruoglie nun se campa cchiu.
Me ne vaco pe' sotto 'o muro
e sento addore d''e maccarune.
Me ne vaco pe' Qualiano
e sento addore d''e patane.
Me ne vaco p''o Ranatiello
e sento addore d''e friarielle.
Ma si vaco add''o putecaro
tutte cose va cchiu caro
ma verite quanno maie
'sta miseria va aumentanno
e aumenta ogge e aumenta dimane
e doppodimane
sabbato si e dummeneca no,
chi fatica se more 'e famme,
'na vota ca si e 'na vota ca no,
chi fatica se more 'e famme,
'na vota ca si e 'na vota ca no....