Testo: Surghjenti. Dumani. L'omu.

Un omu era pusendu annantu a lu so zuddu
U so capeddu in manu asciuvaia u sudori
Chi misciava da u fronti chi eramu di luddu
Staghjoni a piu cruda d'annoiu e di calori

E po l'omu allisciava u so capu sbiancatu
Da l'anni e da u stentu e da tanti pinsera
Di tutt'una ciucciata solu era firmatu
In 'ssa casa paterna pa viva a so manera

Tutti li so fiddoli si n'erani andati
A stinta pani fora cussi he u distinu
In 'ssa tinta campagna indu quiddi chi so nati
Ni francani u mari chi l'avvena he mischinu

Ma u so capu biancu, piu biancu duvintaia
Videndu di i so chjosa i muraddi sfraiati
Tristu e pinserosu u tintu suspiraia
parlendu da par se ramintaia u passatu

" Qual sara mai piu ch'arrizzara 'ssi mura
Pisati un si sa quandu da i me antinati
Parchi i mi fiddoli un he mancu sicura
Vinarani d'un saltu a vedami 'ss'istati... "

E quidda casaredda induva tanti ziteddi
So nati so crisciuti hani risu e po pientu
E dopu tanta gioia come in un volu d'aceddi
Ni so tutti fughjuti in un buffulu di ventu

Chi ci aghju piu da fa in 'ssi rughjona cari
A posta chi piu nimu mi teni cumpagnia
E ch'ugnunu he andatu a godassi u mari
Come si a campagna he tarra d'arasia

E l'omu addispiratu da a so sorti crudeli
Stringhjia u so capeddu par impidi l'angoscia
Chi li spizzaia u pettu pisendu l'occhja in celi
Prigaia u signori di tenali a coscia